अमेरिकी मध्यावधि निर्वाचनबाट डेमोक्र्याटिक पार्टीले सिनेटको नियन्त्रण आफ्नो हातमा लिएको छ।
रिपब्लिकनले बलियो पकड बनाएका राज्यहरूमा समेत लगातार जित निकाल्दै डेमोक्र्याटिक पार्टीले सिनेटमा बहुमत पुर्याएको अन्तर्राष्ट्रिय समाचार संस्था रोयटर्सले लेखेको छ।
निर्वाचनअघि १०० सदस्यीय सिनेटमा रिपब्लिकन पार्टीका ५३ र डेमोक्र्याटिक पार्टीका ४५ सदस्य थिए।
दुई स्वतन्त्र सांसदले पनि डेमोक्र्याटिक पार्टीलाई समर्थन गर्दै आएका थिए।
सिनेटमा बहुमतका लागि ५१ सिट आवश्यक पर्छ।
बहुमतमा पुग्न डेमोक्र्याटिक पार्टीले रिपब्लिकनबाट कम्तीमा चार सिट खोस्नुपर्ने थियो। यसपटक उसले रिपब्लिकनबाट ६ वटा सिट खोसेपछि सिनेटको नियन्त्रण आफ्नो हातमा लिएको हो।
रोयटर्सका अनुसार आयोवा राज्यमा अप्रत्याशित जित निकालेपछि डेमोक्र्याटिक पार्टीले सिनेटमा आफ्नो बहुमत सुनिश्चित गरेको हो।
नर्थ क्यारोलिनामा रोय कुपरले रिपब्लिकन माइकल वाट्लीलाई, टेक्ससमा जेम्स टालारिकोले केन प्याक्सटनलाई, साउथ क्यारोलिनामा एनी एन्ड्र्युजले डार्लिन ग्राहमलाई, ओहायोमा शेरोड ब्राउनले जोन हस्टेडलाई, कन्सासमा एडम ह्यामिल्टनले रोजर मार्सललाई र आयोवामा डेमोक्र्याटिक उम्मेदवारले रिपब्लिकन उम्मेदवारलाई हराउँदै छ सिट खोसेका हुन्।
टेक्सस, कन्सास र साउथ क्यारोलिनालाई रिपब्लिकनको बलियो प्रभाव रहेका राज्य मानिन्छ।
डेमोक्र्याटिक पार्टीले आफूले जोगाउनुपर्ने मिशिगनमा पनि अग्रता लिइरहेको छ। मिनेसोटाको सिट भने उसले गुमाएको छ।
टेक्सासमा डेमोक्र्याटिक उम्मेदवार जेम्स टालारिकोले राष्ट्रपति डोनाल्ड ट्रम्पले समर्थन गरेका रिपब्लिकन उम्मेदवार केन प्याक्सटनलाई पराजित गरे। तीन दशकभन्दा बढी समयदेखि टेक्ससमा राज्यस्तरको कुनै पनि चुनाव नजितेको डेमोक्र्याटिक पार्टीका लागि यो जित विशेष महत्त्वपूर्ण छ।
साउथ क्यारोलिनामा डेमोक्र्याटिक उम्मेदवार एनी एन्ड्र्युजले रिपब्लिकन उम्मेदवार डार्लिन ग्राहमलाई हराइन्। ग्राहमलाई ट्रम्पले यसै वर्ष निधन भएका आफ्ना दाजु तथा सिनेटर लिन्डसे ग्राहमको ठाउँमा उम्मेदवार बनाएका थिए।
ओहायोमा डेमोक्र्याटिक उम्मेदवार शेरोड ब्राउनले सिनेटको सिट जिते। दुई वर्षअघि यही सिटबाट अहिलेका उपराष्ट्रपति जेडी भान्स निर्वाचित भएका थिए।
दुई वर्षअघि राष्ट्रपति निर्वाचनमा ट्रम्पले साउथ क्यारोलिनामा १८ प्रतिशत र कन्सासमा १६ प्रतिशत मतान्तरले जितेका थिए। त्यस्ता राज्यमा समेत डेमोक्र्याटिक उम्मेदवार विजयी हुनुले यसपटकको निर्वाचनमा मतदाताको समर्थनमा आएको परिवर्तन देखाएको रोयटर्सको समाचारमा उल्लेख छ।
नर्थ क्यारोलिनामा पूर्वगभर्नर रोय कुपरले रिपब्लिकन उम्मेदवार माइकल वाट्लीलाई हराएर सिनेट सिट जितेका थिए। जर्जियामा जोन ओसफ र न्यु ह्याम्पसायरमा क्रिस पापासले पनि आफ्नो पार्टीका सिट जोगाए। यी जितले सिनेटमा डेमोक्र्याटिक पार्टीको बहुमत थप सुनिश्चित गरेका छन्।
प्रतिनिधिसभामा भने मतगणना जारी छ। ४३५ सदस्यीय प्रतिनिधिसभामा बहुमतका लागि २१८ सिट आवश्यक पर्छ। निर्वाचनअघि रिपब्लिकन पार्टीसँग झिनो बहुमत थियो। डेमोक्र्याटिक पार्टीले बहुमतका लागि कम्तीमा तीन सिट थप जित्नुपर्ने थियो।
प्रारम्भिक नतिजामा रिपब्लिकनका केही सुरक्षित मानिएका निर्वाचन क्षेत्रमा समेत डेमोक्र्याटिक उम्मेदवारले जित निकालेपछि प्रतिनिधिसभाको नियन्त्रण पनि उसकै हातमा पुग्ने सम्भावना बढेको अमेरिकी समाचार संस्था एसोसिएटेड प्रेसले जनाएको छ।
गभर्नरका चुनावमा पनि डेमोक्र्याटिक पार्टीले महत्त्वपूर्ण सफलता हासिल गरेको छ। टेक्ससमा जिना हिनोजोसाले रिपब्लिकन गभर्नर ग्रेग एबटलाई हराइन्। ओहायोमा एमी एक्टनले रिपब्लिकन विवेक रामास्वामीलाई पराजित गरिन्। जर्जियामा किशा लान्स बटम्स निर्वाचित भइन्। फ्लोरिडामा भने रिपब्लिकन उम्मेदवार बायरन डोनाल्ड्स गभर्नर निर्वाचित भए।
निर्वाचनमा रिपब्लिकन पार्टीले अपेक्षित परिणाम ल्याउन नसकेपछि ट्रम्पले सामाजिक सञ्जालमार्फत् आफू उम्मेदवार नभएकाले यस्तो नतिजा आएको आशय व्यक्त गरेका छन्।
उनले लेखेका छन्, ‘म मतदानमा उम्मेदवार थिइनँ। यदि म उम्मेदवार भएको भए हामी भारी मतान्तरले जित्ने थियौँ।’
